Sa tutela de s'ambiente (solu) in 4:3
a incoru de Tore Cubeddu
Capo e croce, su film de Pani e Carboni at bìnchidu sa setzione documentàriu de su festival Cinemambiente 2014. Est una noa de importu mannu chi atzunghet un'àteru matone a sa domo chi cun impinnu sunt fraighende sos autores sardos, cambiente – cun su traballu issoro – s'immàgine (sa rapresentatzione e autorapresentzatzione) de sa Sardigna in su mundu.
Ma sa chistione de prus interessu, abbaidende a sos motivos chi l'ant fatu bìnchere, est su raportu intro de custu traballu e s'ambiente, ca non si podet nàrrere chi Capo e croce siat unu film a sa manera de Oil o Materia oscura o calchi àteru chi in custos annos at donadu visibilidade a sa chistione de s'incuinamentu in Sardigna. Su film de Pani e Carboni no est mancu unu documentàriu de inchiesta o unu film etnogràficu.
Capo e croce contat su raportu intro de s'òmine e s'ambiente cun rigore, sena de si cuare a segus de s'ipocrisia, s'immobilismu o sa didascalia chi bortas meda caraterizat custa genia de pellìculas. In su film de sos registas casteddajos, sa terra est unu logu in ue s'òmine bivet e traballat, istimandela e respetandela, e in custu sos pastores sardos sunt e podent èssere sa pandela de sa sustenibilidade chi tantu chircamus, de s'echilìbriu chi – a faeddos – polìticos e intelletuales preigant sena de resultadu perunu.
Su film de Pani e Carboni est sìncheru, est sa realidade contada cun sa limba de su cìnema, est su mundu disordinadu e in aparèntzia sena de càbodo, postu in intro de sas règulas de sa drammaturgia.
S'ambiente chi bidimus in biancu e nieddu movet sos colores in chie dd'abbaidat, ca nois sardos, e totu sos chi ant bidu a su nessi una borta sa Sardigna, l'ischint ca est tinta de totu sas tonalidades de s'arcu in chelu. A sos colores los ammentamus e los disigiamus. Tando su prèmiu prus mannu est a bìdere colare su messàgiu de custu film.
Chi su prèmiu prus mannu siat a sos sardos, chi potzant torrare a bìere sa terra issoro cun sos colores chi li deghet e chi tantas bortas bidimus in imbisione.
Articoli correlati:
“Capo e croce” di P. Carboni e M. A. Pani
11 giugno 2014