Sa Suzuky “girat” in su cabu de giosso de Sardigna – Càstia sa Photogallery
Giaponesos ispantados dae Casteddu, Nèbida e Masua, e Carloforte. Spot publicitàriu in intro de bidda tabarchinu. de Maria Elena Tiragallo
Casteddu, Nèbida, Masua e Carloforte. Bator firmadas diferentes acapiadas dae unu fil rouge ebbia, est a nàrrere s’interessu e s’atentu de sos giaponesos. A su mancu custa borta non pro su màndigu, mesche cussu de sa tunina ruja, ma comente location pro su set cinematogràficu de s’ispot promotzionale de sa Suzuky (immàgines de Antonello Rivano).
Gosi, sa Sardigna de giosso est protagonista cun sas bellesas naturalìsticas suas e cun sos colores suos. Su biàgiu comintzat dae Casteddu, dae intro de bidda, Pratza San Benedetto ma finas arruga Manno. Posca tocat a su Surcis, cun Nèbida e Masua. Ma tocat finas a Carloforte. Ciak si girat… finas dae mangianeddu, si comintzat dae sa bidda carlofortina cun arruga XX Settembre, posca Pratza Repubblica, arruga Solferino, ma finas sas furriadas de Capo Sandalo. Ispantados sos chi colant abbàidant a sa troupe. B’at in su set finas su visusìndigu de Carloforte, Battista Rossino, prontu a isòrvere cale chi siat istrobbu chi essit a s’ùrtimu. “Est un’ocasione pro fàghere connòschere Carloforte e totu s’ìsula de santu Pedru ca sas ripresas ant pertocadu finas sa leada de Capo Sandalo. Una bidrera chi podet giùghere finas àteras produtziones e turistas”, at naradu su visusìndigu Battista Rossino.
“Caruggi e caruggeti”, est a nàrrere gùturos e guturinos, òspitant sa troupe ue b’ant 60 traballadores, e medas sunt sardos. Current sos modellos noos de sa domo automobilìstica, belle non si podet arribare a sos giaponesos chi sunt traballende. Gasi Carloforte s’est mudada pro una die in set cinematogràficu ospitende sa domo de produtzione urbis de Tokyo, chi est girende unu vìdeu istitutzionale.
Serradu su set. Pro bìdere “sas immàgines de domo nostra” s’at a dèpere isbetare su beranu chi intrat, cando ant a presentare a manera ufitziale in su mercadu sos modellos noos de vetura e sa moto de istrada targados Suzuky.
17 dicembre 2014