S'Animu de Marina Anedda

de Tore Cubeddu

Custu documentàriu, de pagu prus de mesora, est unu de sos meda film chi sunt istados fatos a pitzu de s'Ardia de Sèdilo, ma – cunforma a sos àteros – tenet unu puntu de vista originale meda, chi nos mustrat unu logu e sa gente sua dae intro, sighende unu tema de importu chi mannu chi intrat in mèritu a su sentidu de una bidda, de sa sacralidade e de sas dinàmicas de una de sas festas prus de importu in Sardigna.

S’animu, pro sos sedilesos est sa devotzione, sa fide, s'ablidade e su coràgiu chi depet tènnere unu cadderi de s'àrdia. Custas calidades las depent tènnere sos òmines chi cherent cùrrere pro votu a Santu Antine Imperadore, e sas fèminas, lu podent tènnere s'ànimu?

Emanuela, una pitzinna sedilesa, ischit setzire a caddu e cheret currere pro su santu, su preide de sa bidda dd'at iscrita in s'elencu de chie, dae minore, pedit de pòdere pigare parte a s'Ardia. Ma pro traditzione sa fèmina preparat sa festa, su màndigu, sos durches e pregat, s'òmine curret.
Issaras ite nde narant sos caddersi sedilesos? Custu film nde regollet sas testimonias, sas ideas, sos isetos. Su chi nde bessit a foras est unu sàgiu de antropologia interessante meda. Òmines e fèminas de Sardigna, su raportu intre issos, sa partzidura de sos ruolos in sa sotziedade, s'ànimu.
Custu film est una prenda de su documentàriu in Sardigna. Unu film chi non podet mancare in sa videoteca sarda.

23 dicembre 2014