Tempus de baristas de Mc Dougall
de Tore Cubeddu
Custu documentàriu, fatu dae unu de sos mastros mannos de s'antropologia visuale est unu de sos film de prus importu de sa tzinematografia sarda, o mègius fata in Sardigna.
Comente acuntesset a sas terras chi tenent traditziones profundas e contos meda de torrare, o chi mancari, in s'idea de sos istudiosos sunt logos chi ant sighidu s'àndala de su progressu e de sa modernidade, sa Sardigna est istada bortas meda ogetu de istùdiu pro s'antropologia visuale. Sos registas de custu gènere tzinematogràficu chircant s'originalidade, mundos chi ant cunservadu carateres chi non sunt mudados in su tempus o chi portant a intro dinàmicas ùnicas.
Mc Dougall resurtat a intrare in sa sotziedade sarda cun seriedade e delicadesa manna, comente una pantama osservat sa vida e sos isetos de tres pastores chi bivent in sos montes de s'Ogiastra, su cuadru chi nde bessit a foras est ispantosu.
Pietro est unu pitzinnu de deghesete annos chi diat a chèrrere cambiare su destinu sou: istùdiat e bivet segunde règulas e dinàmicas de su mundu contemporaneu; Franciscu, su babbu, diat a chèrrere su mègius pro su fìgiu, cumprèndet sas dificultades suas a sighire a fàghere su chi isse at fatu finas a oe, ma a su matessi tempus non diat a chèrrere chi su fìgiu esseret lassadu totu sas sienda de sa famìllia. Miminu, atendet sas crabas de sa famìllia sua e resultat, cun pagos faeddos a fàghere unu cuadru pretzisu meda de sa crisi de su traballu chi faghet, contende su sentidu sou de òmine chi bivet, su prus de su tempus, a sa sola in sos montes.
Custu film, fatu in s'istade e in s'atòngiu de su 1992 at bìnchidu prèmios meda, ca portat a intro sos carateres e sa complessidade de su romanzu contemporàneu, mancari chi, in su matessi tempus, sigat a èssere unu documentàriu chi lassat a sos personàgios s'imprenta e sa ghia.
Dae s'Austràlia a sa Sardigna sa capatzidade de contare est sena tempus e sena logu, pro custa resone, custu film non podet mancare in sa videoteca sarda de oe.
23 dicembre 2014