"La valigia di Tidiane Cuccu" de Umberto Siotto e Antonio Sanna

de Tore Cubeddu

Totu sos sardos chi ant giradu sas festas in sos annos 80 e 90 si l'ant a ammentare a tziu Antoni Cuccu, unu sennore de Santu 'Idu, chi cun una valìgia de cartone si setziat in sas carrelas a bèndere libreddos de poesia, de garas, poemas e farsas teatrales in limba sarda.

Lu faghiat ca cretiat in sa cultura e in s'ispainamentu suo, pro nde torrare a ischidare sa cussèntzia de sos sardos "ammachiados dae cosas de pagu contu". Cando tziu Antoni si nche est mortu s'eredidade sua l'at pigada unu pitzinnu senegalesu Tidiane Diagne, chi oe sighit a bèndere sos libreddos suos e àteros libros puru in sas festas.

Su film de sos registas nuoresos Sanna e Siotto nos contat cun poesia manna, finas cun partes de fiction, custa istòria bella meda, una de cussas chi sos giornalistas mutint good news, ca nos torrat unu pagu de ispera di sos òmines. Diagne at bìnchidu in su 2007 su prèmiu Maria Carta. Sos autores nos si lu narant a sa fine, ma comente chi fessat unu printzìpiu, ca de ingunis cumintzat un'àtera istòria, sa de unu sardu nou, bènnidu dae s'Africa, chi at postu unu oagu de raighinas bonas inoghe puru.
Custu film, binchidore de su cuncursu Il cinema racconta il lavoro, nos contat su traballu e s'òmine in sa Sardigna de oe. Est una bella letzione de vida e pro custu, intrat in sa videoteca nostra.

23 dicembre 2014